Homenaxe a Manuel Maria en Monforte

DIA 4 DE AGOSTO

HOMENAXE A MANUEL MARIA (web do concello de Monforte)

Monforte de Lemos, 04/08/2006

Manuel María xa conta cun monumento nunha praza de Monforte

O pobo de Monforte rendiu no serán de onte unha merecida e sentida homenaxe a Manuel María.

O Concello quixo tributar o seu repecto e admiración polo excelso poeta, comprometido loitador, e grandioso conversador que pasou a maior parte da súa vida na cidade do Cabe, erguendo un monumento na súa memoria moi preto de onde residiu durante corenta anos, na Praza da Ponte Fontecha.

Trátase dunha escultura do artista José Antonio Ferrer que representa a Manuel María nunha actitude na que era frecuente velo na librería Xistral que, xunto coa súa dona, rexentou ó longo de moitos anos en Monforte. O poeta aparece sentado á beira dunha mesa camilla, lendo un libro e agardando a chegada dun bo conversador. Ó lado da mesa hai outra cadeira baleira para que quen queira poida sentarse como se estivera de tertulia co gran conversador.

O acto de inauguración, ó que asistiron preto de 300 persoas, foi conducido polo economista Manuel Rajo, quen subliñou que o obxectivo do mesmo era “render tributo a un home que nunca perdeu a memoria”.

O Alcalde de Monforte, Severino Rodríguez, calificou ó poeta como “un monfortino cabal”, lembrou algún dos seus versos e o seu carácter comprometido coa cidade e coa comarca, así como o labor de promoción dos poetas e literatos desta terra.

A Conselleira de Cultura e Deporte, Ánxela Bugallo, sinalou na súa alocución que “Monforte, grazas a Manuel María, converteuse nun foco da irradiación da nosa cultura”.

Finalmente, a súa viúva, Saleta Goi, deu as grazas de xeito emocionado “ó pobo de Monforte polos corenta anos nos que vivimos aquí e nos que fomos moi felices”

Durante o acto escoitáronse dous poemas gravados recitados polo propio Manuel María e soaron as notas dunha das súas pezas predilectas “Alborada de Veiga”, así como o hino galego interpretado por un cuarteto de gaiteiros.

Xunto á escultura que representa ó poeta e sobre o chan da praza, colocouse unha placa cuns versos de Manuel María sobre o idioma galego, versos que foron elixidos pola súa viúva: “O povo que deixa perder a súa palabra/ creada, herdada, usada, revelada,/ aquela que lle é propia e singular/ a que é únicamente súa, está empobrecendo ó mundo/ e perpetrando o seu propio xenocidio”.

No acto, cargado de emotividade e admiración polo poeta, estiveron presentes os concelleiros do equipo de goberno, varios membros da Corporación, e os alcaldes de Pantón e Sober.